महाराष्ट्रातील दुष्काळ होणार भूतकाळ: मुख्यमंत्र्यांची मोठी घोषणा

विदर्भासोबतच मराठवाड्याला दुष्काळमुक्त करण्यासाठी कोकणातून गोदावरी खोऱ्यात ५५ टीएमसी पाणी वळवण्याचे काम अंतिम टप्प्यात आहे. मार्च २०२६ पर्यंत या प्रकल्पाच्या सर्व मान्यता मिळवून काम वेगाने पूर्ण करण्याचा सरकारचा मानस आहे. याशिवाय दमणगंगा-एकदरे-गोदावरी, नारपार-गिरणा यांसारख्या विविध प्रकल्पांच्या माध्यमातून २.४१ लाख हेक्टर जमीन सिंचनाखाली आणली जाणार आहे.

ADS किंमत पहा ×

पश्चिम महाराष्ट्रातील सांगली आणि कोल्हापूर भागातील पुराच्या पाण्याचे नियोजन करण्यासाठी ‘वर्ल्ड बँक’च्या मदतीने ‘फ्लड डायव्हर्जन’ प्रकल्प राबवण्यात येत आहे. दरवर्षी पुराचे सुमारे १०० टीएमसी पाणी वाहून जाते, त्यापैकी ३०-३५ टीएमसी पाणी वळवून उजनी धरणापर्यंत आणले जाईल. हे पाणी पश्चिम महाराष्ट्रातील आणि मराठवाड्यातील दुष्काळी तालुक्यांना दिले जाणार आहे. या प्रकल्पाला जागतिक बँकेने निधी आणि मान्यता दोन्ही दिले आहे.

हे सर्व प्रकल्प ‘जनरेशनल’ म्हणजेच पिढ्यानपिढ्यांचे भविष्य बदलणारे आहेत. जरी या कामांना ७ ते ८ वर्षे लागणार असली, तरी हे प्रकल्प पूर्ण झाल्यावर महाराष्ट्रातून दुष्काळ हा शब्द कायमचा पुसला जाईल, असा विश्वास मुख्यमंत्र्यांनी व्यक्त केला.

निधी वाटपाबाबत बोलताना त्यांनी स्पष्ट केले की, विदर्भ आणि मराठवाड्यावर कोणताही अन्याय होऊ दिला जाणार नाही. विदर्भाला अपेक्षित २३ टक्क्यांच्या ऐवजी २५.८५ टक्के आणि मराठवाड्याला १८ टक्क्यांच्या ऐवजी १९ टक्के निधी देऊन या भागाच्या विकासाला प्राधान्य दिले जात आहे.