महाराष्ट्रात गेल्या काही दिवसांपासून थंडीचा जोर वाढला असून, नाताळच्या मुहूर्तावर राज्यात थंडीचा कडाका अधिक तीव्र होण्याची शक्यता आहे. हवामान अभ्यासकांनी दिलेल्या माहितीनुसार, सध्या उत्तर भारताकडून येणाऱ्या थंड वाऱ्यांचा प्रभाव राज्याच्या उत्तर भागापर्यंत पोहोचला आहे. यामुळे येत्या काही दिवसांत किमान तापमानात मोठी घट नोंदवली जाणार असून, डिसेंबरअखेरपर्यंत ही स्थिती कायम राहील.
राज्यातील विविध शहरांचे तापमान
हवामान अभ्यासकांनी नोंदवलेल्या आकडेवारीनुसार, राज्यातील अनेक शहरांमध्ये पारा १० अंशांच्या खाली घसरला आहे. नाशिक, जळगाव आणि मालेगाव येथे तापमान ९.५ ते ९.८ अंश सेल्सिअसच्या दरम्यान नोंदवले गेले असून उत्तर महाराष्ट्र गारठला आहे. पुणे शिवाजीनगर भागात ९.९ अंश सेल्सिअस तापमानामुळे पुणेकरांना हुडहुडी भरली आहे. विदर्भाचा विचार करता नागपूर १०.६ अंश, गोंदिया ९.६ अंश आणि यवतमाळ १०.६ अंश सेल्सिअसवर पोहोचले आहे. सोलापूर आणि कोल्हापूर सारख्या दक्षिणेकडील जिल्ह्यांमध्ये सरासरी १३ ते १५ अंश सेल्सिअस तापमान असून उत्तरेकडून येणारे थंड वारे सक्रिय असल्याने थंडीची लाट कायम आहे.
