हवामान तज्ज्ञ पंजाब डख यांचा नवा अंदाज राज्यात पावसाचे सावट नाही, पण थंडीचा कडाका कायम? हवामान तज्ज्ञ पंजाब डख यांनी २१ डिसेंबर २०२५ रोजी राज्यासाठी हवामानाचा नवा अंदाज वर्तवला आहे. त्यांच्या माहितीनुसार, २१ ते २३ डिसेंबर या तीन दिवसांच्या कालावधीत राज्यात ढगाळ वातावरण राहणार आहे. विशेषतः पश्चिम महाराष्ट्र आणि उत्तर महाराष्ट्रामध्ये ढगाळ हवामानाचा प्रभाव अधिक जाणवेल. मात्र, या ढगाळ वातावरणामुळे पावसाची अजिबात शक्यता नसल्याने शेतकऱ्यांनी घाबरून जाण्याचे कारण नाही. दिवसा आभाळ असले तरी थंड वारे वाहतील आणि गारवा कायम राहील.
राज्यात ३० डिसेंबरपर्यंत पावसाचे कोणतेही संकेत नसून थंडीची तीव्र लाट कायम राहणार आहे. नवीन वर्ष २०२६ च्या सुरुवातीला म्हणजेच १ जानेवारीला पुन्हा एकदा ढगाळ वातावरण निर्माण होण्याची शक्यता आहे. हे वातावरण टरबूज, खरबूज यांसारख्या वेलवर्गीय पिकांसाठी आणि उसाच्या उगवणीसाठी अत्यंत पोषक ठरेल. ३० डिसेंबरच्या मध्यरात्रीपासून राज्यात ढगाळ हवामान वाढेल, परंतु थंडीचा जोर २० जानेवारी २०२६ पर्यंत कायम राहणार आहे, असेही डख यांनी स्पष्ट केले आहे.
