PM किसान सन्मान निधी: वार्षिक १२ हजार रुपयांच्या वाढीबाबत केंद्र सरकारची मोठी घोषणा
पंतप्रधान किसान सन्मान निधी (PM Kisan) योजनेचा वार्षिक हप्ता ६ हजार रुपयांवरून १२ हजार रुपये करण्याबाबत गेल्या अनेक दिवसांपासून चर्चा सुरू होती. मात्र, संसदेच्या हिवाळी अधिवेशनात केंद्र सरकारने यावर स्पष्टीकरण दिले आहे. तृणमूल काँग्रेसचे खासदार समीरुल इस्लाम यांनी राज्यसभेत विचारलेल्या प्रश्नाला उत्तर देताना केंद्रीय कृषी राज्यमंत्री रामनाथ ठाकूर यांनी सांगितले की, पीएम किसानचा हप्ता १२ हजार रुपये करण्याचा सध्या केंद्र सरकारचा कोणताही विचार नाही. यामुळे या वाढीची प्रतीक्षा करणाऱ्या शेतकऱ्यांची निराशा झाली आहे.
संसदेच्या स्थायी समितीने डिसेंबर २०२४ मध्ये सादर केलेल्या अहवालात नैसर्गिक आपत्ती आणि शेतमालाच्या दरातील चढउतार लक्षात घेऊन हा निधी वाढवण्याची शिफारस केली होती. हवामान बदलामुळे पिकांचे होणारे नुकसान आणि हमीभावापेक्षा कमी दराने होणारी शेतमालाची विक्री यामुळे शेतकरी आर्थिक अडचणीत आहेत. अभ्यासक आणि अर्थतज्ज्ञांनीही अर्थसंकल्पापूर्वी ही रक्कम दुप्पट करण्याची मागणी केली होती. मात्र, सरकारने हा प्रस्ताव सध्या तरी बाजूला ठेवला असून, वार्षिक ६ हजार रुपयांचाच लाभ कायम ठेवण्याचा निर्णय घेतला आहे.
